បទពិសោធន៍​ត្រៀម​ដើរព្រៃ​ឡើង​ភ្នំផ្សងព្រេង​​លើកដំបូង

អ្វីដែលអ្នកគួរដឹងមុនសម្រេចចិត្តឡើងភ្នំ ចូលព្រៃ ឬចាប់ផ្តើមដំណើរកម្សាន្តបែបផ្សងព្រេង។ ពេលអ្នកចង់ដើរព្រៃរឺដើរឡើងភ្នំ តើគួរត្រៀមអ្វីខ្លះ?​ ថ្ងៃនេះខ្ញុំសូម​ចែករំលែកបទពិសោធន៌ជាក់ស្តែងដែលធ្លាប់ឆ្លងកាត់ច្រើនដងកន្លងមកហើយ​ជូន​បង​ប្អូន​ទាំង​អស់​គ្នា​។ ការដើរផ្សងព្រេងបោះជំរុំរឺឡើងភ្នំ​មិនមែន​សុទ្ធតែអាច​រំពឹង​ទុក​ដូចការគិតទាំង​អស់​នោះ​ទេ គឺ​ថា​​អ្វីៗសុទ្ឋតែអាចជាការប្រថុយប្រថាន។ ហើយសំភារះទៀតសោធក៏រួមចំណែកយ៉ាងសំខាន់អោយអ្នក អាចសម្រេចគោលដៅរឺក៏អត់ទៅតាមចំនួនថ្ងៃដែលអ្នកចង់ទៅដែរឬ​អត់​។

• អ្វីខ្លះអ្នកគួរតែត្រៀម៖

អ្វីដែលសំខាន់បំផុតសម្រាប់អ្នកឡើងភ្នំ ឬដើរព្រៃលើកដំបូងត្រូវដឹងនោះគឺ ទំងន់សាកាដូ ដែលខ្លួនស្ពាយ​ សម្រាប់បុរសគួរត្រឹម៨ ទៅ១០គីឡូទាំងទឹក ហើយនិង​ នារីគួរត្រឹម៥ ទៅ៧គីឡូ និយាយរួមកាន់តែស្រាលកាន់តែល្អ។

១. សំភារះសម្រាប់គេង

– កូនអង្រឹងតូចមួយនិងប្រភេទតង់គ្របការពារអង្រឹងពីទឹកភ្លៀង(បើអាចកុំប្រើតង់សម្រាប់បោះ ព្រោះវាធ្ងន់ហើយងាយសើមទឹកនិងពិបាកដាក់តាមខ្លួន)។
– កូនភួយ(Sleeping Back)អាចគ្របដណ្តប់អ្នក ការពារសំនើមនិងងាយបត់ចូល ងាយដាក់តាមខ្លួន។
– ខ្នើយខ្យល់(inflatable pillow)ងាយប្រើមាត់ផ្លុំខ្យល់

២. សម្លៀកបំពាក់

– អាវដៃខ្លីនិងខោជើងខ្លីមួយឈុត
– អាវដៃវែងនិងខោជើងវែង សាច់ស្វិតយឺតហើយស្រាល2ឈុត(ហាមយកខោអាវណាធ្ងន់ៗងាយបឺតទឹកដែលបង្កើនទម្ងន់អ្នក)
– អាវភ្លៀង
– អាវរងារ១ ស្រោមដៃស្រោមជើងក្រាស់២គូរ
– មួក/កន្សែងរុំក
– ស្បែកជើងឡើងភ្នំ/ដើរព្រៃមួយគូរ និងស្បែកជើងផ្ទាត់មួយគូរ
– កែវ/ឆ្នាំងសម្រាប់Adventureមួយឈុត
– ការបូបស្ពាយល្មមខ្លួន(Backpack)
– កូនកាំបិតដើរព្រៃ/ដេកកេះ
– កូនចង្ក្រានហ្គាសសម្រាប់ដើរព្រៃ(រដូវភ្លៀង)

៣. អារហារ

– គួរត្រៀមអាហារណាក្រៀមស្រាលងាយដាក់តាមខ្លួន
​ (ត្រីខកំប៉ុង មី ត្រីងៀត គោងៀត…)

៤. សំភារះសំខាន់ផ្សេងៗ

– ថ្នាំបាញ់ស្បែកការពារសត្វល្អិត
– ទុយោជម្រោះទឹកស្អាត
– ក្រដាស់សើម
– ពិលពាក់ក្បាលនិងពិលឆ្លុះមួយ
– ឈើច្រត់ឡើងភ្នំ(ឬស្សីក៏បានតែធ្ងន់បន្តិច)
– សំភារះសង្គ្រោះបឋម

តិចនិកការដើរឡើង និងចុះសម្រាប់អ្នកដំបូង និងមានគីឡូធ្ងន់ ចាំបាច់ណាស់បំផុតត្រូវមានស្រោមដៃ និងឈើច្រត់ សម្រាប់ការដើរឡើងអ្នកគួរដើរបោះជំហានខ្លីៗ យឺតៗ (បញ្ជាក់អីវ៉ាន់អ្នកស្ពាយឡើងទៅមិនលើសពី១០គីឡូ) និងពេលចុះមកវិញត្រូវប្រើឈើច្រត់២ សម្រាប់ជួយទប់លំនឹង ហើយដើរបោះជំហានវែងៗ ល្មម លឿនៗ បន្តិចដើម្បីកុំអោយឈឺកជើង តែត្រូវប្រយ័ត្នកុំអោយគ្រេចកជើង ហើយចំនុចសំខាន់១ទៀតដែលគួរដឹងគឺ ការឈប់សម្រាក ការដើរឡើងបើអ្នកយឺតគួរដើរ ១០នាទី-១៥នាទី ឈប់ម្តងហើយឈប់តែ ២-៣នាទីប៉ុណ្ណោះ ហើយរាល់ពេលឈប់ត្រូវដោះគន្លឹះសាកាដូចេញពីស្មាអោយស្រាល ហើយអង្គុយសណ្តូកជើងត្រង់ ដៃតប់តិចៗ លើសាច់ដុំជើងរបស់អ្នក។

ចំណាំ៖

•  មុនពេលចេញដើរផ្សងព្រេងតាមព្រៃរឺឡើងភ្នំគួរធ្វើលំហាត់ប្រាណតាមចំណូលចិត្តខ្លួន(ជិះកង់ រត់..)ដើម្បីអោយសាច់ដុំនិងប្រព័ន្ធដង្ហើមមានភាពស៊ាំ។
•  ហាមផឹកភេសជ្ជះប៉ូវកម្លាំងផ្សេងៗ ពេលកំពុងតែហត់ខ្លាំងព្រោះអាចគាំងបេះដូងស្លាប់ ដោយសារតែបេះដូងអ្នកកំពុងលោតខ្លាំង ហើយអ្នកបន្ថែមអោយវាលោតរឹតតែញ៉ាប់ថែមទៀត។
• អ្នកដែលមានជំងឺបេះដូងរឺជំងឺប្រចាំកាយផ្សេងៗ គួរកុំដើរផ្សងព្រេងអី។

សូមមើលផងដែរ៖

• ៩ ចំណុចសម្រាប់ការត្រៀមខ្លួនដើរព្រៃជាលើកដំបូង
• ខ្ញុំ​ឡើង​ភ្នំ​​ឱរ៉ាល់​បាន​សម្រេច
• ដំណើរ​បែប​ផ្សងព្រេង រុក​ព្រៃ ឡើង​ភ្នំ បោះតង់​ នៅ​លើ​ភ្នំ​ ខ្នង​ផ្សា
• មកដាំ​កូន​ឈើនិង​ដើរ​កំសាន្ត​ក្នុង​ព្រៃ​សហគមន៍​ទឹក​ធ្លាក់​ចង្រ្កាន​រយ